បទល្មើសឈូសឆាយព្រៃលិចទឹកនៅស្រុកកំពង់ស្វាយ ខេត្តកំពង់ធំ មានពាក់ព័ន្ធមន្ត្រីជំនាញនិងមន្ត្រីអាជ្ញាធរ
22-July-2016 | ដោយ មែន កំសត់
ប្រភពពីប្រជាពលរដ្ឋរស់នៅឃុំកំពង់គោ ស្រុកកំពង់ស្វាយ ខេត្តកំពង់ធំ បានឲ្យដឹងថាកន្លងមកបទល្មើសបំផ្លាញព្រៃលិចទឹកជម្រកត្រីពងកូន ក្នុងមូលដ្ឋានរបស់ពួកគាត់កើតឡើងយ៉ាងពេញបន្ទុក ហើយមន្ត្រីជំនាញនិងមន្ត្រីអាជ្ញាធរ មិនចាត់វិធានការទប់ស្កាត់ប្រកបដោយប្រសិទ្ធភាពឡើយ។ ប្រជាពលរដ្ឋបានបង្ហាញនូវការសង្ស័យទៀតថា គណៈកម្មការសហគមន៍នេសាទ មន្ត្រីជំនាញ និងមន្ត្រីអាជ្ញាធរ ជាប់ពាក់ព័ន្ធទៅនឹងបទល្មើសឈូសឆាយបំផ្លាញព្រៃលិចទឹកប្រមាណ២០០ ហិកតានាពេលកន្លងមក។ តាមការអះអាងរបស់ពលរដ្ឋឃុំកំពង់គោ បានឲ្យដឹងថាកន្លងមកពួកគាត់បានធ្វើសេចក្ដីរាយការណ៍ ទៅមន្ត្រីអាជ្ញាធរឃុំ មន្ត្រីអាជ្ញាធរស្រុកជាញឹកញាប់ ក៏ប៉ុន្តែមន្ត្រីអាជ្ញាធរមិនចាត់វិធានការទប់ស្កាត់បទល្មើសឡើយ។
ដោយសារតែមន្ត្រីអាជ្ញាធរឃុំ មន្ត្រីអាជ្ញាធរស្រុក និងមន្ត្រីជំនាញ មិនចាត់វិធានការទប់ស្កាត់បទល្មើសបំផ្លាញព្រៃលិចទឹក ទើបពលរដ្ឋជាង៤០គ្រួសារនិងមន្ត្រីអាជ្ញាធរភូមិ បានដាក់ពាក្យបណ្ដឹងប្ដឹងមនុស្សមួយចំនួនទៅអង្គភាពប្រឆាំងអំពើពុករលួយ ដែលមានលោក ឱម យ៉ិនទៀង ជាប្រធាន កាលពីដើមខែកក្កដា ឆ្នាំ២០១៦។ ប្រជាពលរដ្ឋនិងមន្ត្រីអាជ្ញាធរភូមិ បានចោទប្រកាន់បុគ្គលទាំងនោះពីបទបំផ្លាញព្រៃលិចទឹក ហើយអំពាវនាវឲ្យអង្គភាពប្រឆាំងអំពើពុករលួយ បើកការស៊ើបអង្កេតរកមុខអ្នកពាក់ព័ន្ធដែលបណ្ដោយឲ្យមានបទល្មើសបំផ្លាញ ព្រៃលិចទឹក។ តំណាងអ្នកភូមិមួយរូបបានឲ្យដឹងថា ពួកគាត់បានប្ដឹងទៅអង្គភាពប្រឆាំងអំពើពុករលួយ ឲ្យចាត់វិធានការលើមនុស្ស៤នាក់នៅស្រុកកំពង់ស្វាយ ដែលបានយកគ្រឿងចក្រឈូសឆាយដីព្រៃលិចទឹកប្រមាណ២០០ហិកតា កាលពីអំឡុងខែមេសា។
នៅក្នុងពាក្យបណ្ដឹងរបស់ពលរដ្ឋឃុំកំពង់គោ បានឲ្យដឹងថាអ្នកភូមិបានស្នើឲ្យអង្គភាពប្រឆាំងអំពើពុករលួយ ស្វែងរកអ្នកជាប់ពាក់ព័ន្ធដទៃទៀតដែលពួកគាត់យល់ថា អាចមានក្រុមគណៈកម្មការសហគមន៍នេសាទសាមគ្គីឃុំកំពង់គោ និងមន្ត្រីជលផលមួយចំនួនជាប់ពាក់ព័ន្ធទៅនឹងករណីឈូសឆាយបំផ្លាញព្រៃ លិចទឹកប្រមាណ២០០ហិកតា។ ជាមួយគ្នានេះមន្ត្រីអង្គការក្រៅរដ្ឋាភិបាលក្នុងខេត្តកំពង់ធំ ក៏បានលើកឡើងដែរថា ប្រសិនបើគ្មានការឃុបឃិតជាមួយមន្ត្រីជំនាញមន្ត្រីអាជ្ញាធរ និងសមត្ថកិច្ចពាក់ព័ន្ធទេនោះ គឺក្រុមជនល្មើសមិនអាចប្រើប្រាស់គ្រឿងចក្រឈូសឆាយបំផ្លាញព្រៃលិចទឹក ប្រមាណ២០០ហិកតាយកធ្វើជាកម្មសិទ្ធិបានឡើយ។ ដូច្នេះអង្គភាពប្រឆាំងអំពើពុករលួយ គួរចាត់វិធានការស៊ើបអង្កេត តាមពាក្យបណ្ដឹងរបស់ប្រជាពលរដ្ឋដើម្បីវែកមុខអ្នកជាប់ពាក់ព័ន្ធ បទល្មើសបំផ្លាញព្រៃលិចទឹកក្នុងឃុំកំពង់គោ ស្រុកកំពង់ស្វាយ ខេត្តកំពង់ធំ យកទៅដាក់ទោសតាមច្បាប់៕
ចំនួនអ្នកទស្សនា
- ថ្ងៃនេះ3951
- ម្សិលមិញ4891
- សប្តាហ៍នេះ19861
- ខែនេះ24701
- ឆ្នាំនេះ809331
- សរុប21251787